|
|
| НАЈНОВИ ВЕСТИ ОД МАКЕДОНИЈА |
Петок.10.9.2010 
|
|
|
|
| РЕПОРТАЖА |
Жените ја „открија“ убавата кабунија
Скопје, 09 февруари 2010(МИМ)
Петстотини жени од дваесетина града во Македонија уживаа, пееја, играа на 15-тата манифестација „Благцата на баба“, која во неделата се одржа во мотелот „Велешко езеро“. Гостите што дојдоа се дружеа, се потсетуваа на убавите мигови од претходните настани, но и вкусија многу слатки, изработени по рецептите на нивните баби, извадени од пожолтените домашни тефтери. Вистинско откритие беше дебарската татлија, наречена кабунија, која албанската жена ја подготвува за свадба. Немаше гостинка што не мина покрај свечената маса и не застана покрај овој специјалитет, да праша од каде е, како се подготвува, но и да го проба.
- Тој се прави со телешко месо, ориз, суво грозје, цимет и со шеќер. Во еден лонец се вари месото, оризот, потоа се додаваат сувото грозје, циметот, шеќерот. Рецептот е стар стотина години, а можеби и повеќе, а јас го научив од баба ми. Се подготвува по свадбата, ден познат како првиче - објаснува Идает Карамети од Дебар, на која и’ требаа неколку часа за да го подготви благото, кое се јаде исклучиво топло.
Жените што го проба овој деликатес беа воодушевени и многу го пофалија специјалитетот.
На масата можеа да се видат 50-ина благи, нешто старо, но и нешто ново за домаќинките што сакаат да бидат во тренд.
- Има слатки што со години може да се видат на оваа манифестација, како што се баклава, алва, шеќерлеме, раванија, фурма, но и нови, кои ретко ги сретнуваме, како мафиши, назми фатме, севиџан. Интересно е што ги откриваме благите на нашите пријателки-Албанки. Ако лани тоа беше „шеќер паре“, кое ни го приготвија гостиварките, годинава хит е кабунија од дебранките - вели Катица Крајчева, една од организаторките на дружењето. Гостинките имаа можност низ разговор и забава да си разменат и понекој старински рецепт, а градоначалникот на Општина Велес им даде домашна задача за следната година, да ги соберат сите рецепти и локалната власт ќе финансира издавање книга во која ќе се најдат славните рецепти од бабите.
- Ако нашите деца, вашите внуци, го јадат кроасанот, колач кој француските баби им го подготвувале на своите внуци, зошто да не направиме и ние наш бренд, по кој светот ќе не’ препознава. И онака имате многу слатки што со задоволство ни ги нудите на трпезите, а по кој внуците ве препознаваат - изјави Горан Петров, градоначалникот на Велес.
Тој на манифестацијата и’ подари 10 илјади денари, што заедно со собраните 15 илјади денари од продадените билети ќе му бидат донирани на шестгодишниот Игор Пановски.
- За тоа на кого ќе му ги дадеме собраните пари се консултираме со општинскиот Црвен крст и годинава решивме тоа да го сториме за малиот Игор, на кој му се потребни за операција во Белград. На овој начин се придружуваме на проектот на учениците од градот, кои собираат пари за ова дете. Можеби средствата се симболични, но тоа го правиме од срце. Ова е и покана до други асоцијации да го сторат истото, бидејќи така многу повеќе ќе придонесеме и ќе му помогнеме на Игор - вели Марија Ѓорѓиева, претседателка на Активот на жени-пензионерки од Велес.
Изминатите 14 години тие знаеле со мајчински инстинкт да погодат на кого треба да му ги донираат парите. Така, лани парите беа подарени на Дневниот центар за деца со посебни потреби и беа купени два апарата за физичка активност на децата. Претходната година парите се наменија за опремување на игротека во Детското одделение при болницата во Велес.
|
|
|
|
|
|
