|
|
| НАЈНОВИ ВЕСТИ ОД МАКЕДОНИЈА |
Петок.10.9.2010 
|
|
|
|
|
|
НА ПОЕТСКАТА МАНИФЕСТАЦИЈА „ПРАЗНИК НА ЛИПИТЕ“ ВО ДПМ
Врачена наградата „Иселеничка грамота“ на Душан Ристевски
Скопје, 09 јули 2010 (МИМ)
Наградата „Иселеничка грамота“, за најдобра поетска збирка на поет иселеник, што традиционално ја доделува Матицата на иселениците од Македонија, денеска свечено беше врачена на Душан Ристевски од Австралија за поетската збирка „Забранета љубов“ на меѓународната поетска манифестација „Празник на липите“, во Друштвото на писателите на Македонија. Наградата во име на лауреатот Душан Ристевски, ја прими Фиданка Танаскова, новинар и долгогодишен соработник на Матицата, а беше врачена од страна на претседателот на Матицата на иселениците од Македонија, Иван Џо Петрески.
-Горда сум и среќна што во името на нашиот иселеник и поет Душан Ристевски ја примам оваа награда. Ристевски е прекрасен човек и достоен Македонец кој со своето дело, на најдобар можен начин, ја претставува нашата татковина во Австралија и секаде во светот. Уште повеќе сум горда и среќна што Матицата на иселениците сите овие години истраја и продолжи и понатаму да ја доделува Иселеничката грамота, најпрестижната поетска награда за поетите од дијаспората, рече Танаскова.
Ова остварување на Ристевски се одликува со впечатливи естетски дострели во обликувањето на префинетите чувства за љубовта како универзален феномен: љубов кон саканата, љубов кон татковината, љубов кон животот. Има една суштинска мисла за љубовта: Кога доаѓа на овој свет човештвото што би правело без љубов? Според тоа љубовта е законик без кој животот и светот би биле бесмислени. Односно ако љубов немам, себе си се немам.
Тој мотив нагласено лирски се наоѓа низ страниците на „Забранета љубов“ на Душан Ристески, кој е еден од ретките сподвижници на духовните и културните вредности на македонската дијаспора во Австралија. Тој спаѓа во редот на оние Македонци кои воспоставија вистински релации со родната земја Република Македонија и неговата втора татковина Австралија, истакна поетесата Светлана Христова Јоциќ, претседател на жири комисијата за доделување на наградата „Иселеничка грамота“.
На 1 јуни 2010 година, во просториите на Матицата на иселениците од Македонија, се состана Комисијата за доделување на наградата „Иселеничка грамота“, што традиционално ја доделува Матицата, од 1992 година, за најдобра објавена поетска книга од македонски иселеници.
Од пристигнатите седум книги жири комисијата во состав: Светлана Христова Јоциќ, претседател, Раде Силја, Веле Смилевски и проф. д-р Љубинка Басотова (членови) како и Елена Оровчанец-Спироска (претставник од Матицата), по разгледувањето на пристигнатите ракописи едногласно ја донесе следната одлука:
Наградата „Иселеничка грамота“ за 2010 година да му се додели на писателот Душан Ристевски од Сиднеј, Австралија, за неговата поетска книга „Забранета љубов“, која со своите естетски вредности се издвои од останатите збирки поезија.
Образложение:
Ова остварување на Ристевски се одликува со впечатливи естетски дострели во обликувањето на префинетите чувства за љубовта како универзален феномен: љубов кон саканата, љубов кон татковината, љубов кон животот. Има една суштинска мисла за љубовта: Кога доаѓа на овој свет човештвото што би правело без љубов? Според тоа љубовта е законик без кој животот и светот би биле бесмислени. Односно ако љубов немам, себе си се немам.
Тој мотив нагласено лирски се наоѓа низ страниците на „Забранета љубов“ на Душан Ристески, кој е еден од ретките сподвижници на духовните и културните вредности на македонската дијаспора во Австралија. Тој спаѓа во редот на оние Македонци кои воспоставија вистински релации со родната земја Република Македонија и неговата втора татковина Австралија.
Скопје 01.06.2010
претседател Светлана Христова Јоциќ
членови: Раде Силјан, Веле Смилевски,
Љубинка Басотова, Елена Оровчанец Спироска
|
|
„Струшки вечери на поезијата” 2009
„Иселеничка грамота” 2009
|
„Иселеничка грамота” за 2009-та
Поезија со лирски акцент и патриотски пориви
Од пристигнатите книжевни дела на Конкурсот на Матицата на иселениците од Македонија, за доделување на наградата „Иселеничка грамота” за 2009 година, во најтесен избор влегоа –Перо Дамчевски Коцин (Австралија) со „Мајкини стапалки”, во издание на Македонското литературно друштво „Григор Прличев“ од Сиднеј, „Песни од туѓина” од Марк Шоболев (САД) во издание на „Македонски духовни конаци“, „Абдоменален прекин“ од Бистра Илин Шеќеровска (Швајцарија), издание на „Македонски духовни конаци“ и „Мозаик на опстојноста” од Ратко Димовски (Хрватска) самостојно издание. Жири комисијата во состав: Светлана Христова Јоциќ (претседател), Раде Силјан, Веле Смилевски, Љубинка Басотова и Елена Оровчанец Спировска (членови) на својата седница одржана на 16 јуни 2009 година, по разгледувањето на пристигнатите ракописи донесе едногласна одлука - наградата „Иселеничка грамота” за 2009 година да му се додели на поетот Марк Шоболев за неговата поетска книга „Песни од туѓина”.
Во образложението на жирито се вели:
Поетот Марк Шоболев е еден од повеќебројните Македонци во дијаспората кои поголемиот дел од животот го минуваат надвор од својот роден праг.
Не стивнува поетот да не пее бидејќи борбата со моливот е најголемо јунаштво.
Ете, токму таа рефлексивна мисла е содржана во нашиот поет, а резултатот е евидентен: Пред читателот се отворени страниците на поетското издание „Песни од туѓина“ во кои наоѓаат силен одраз чувствата, намерите, посветеноста и сеоддаденоста на поетот на својата земја.
Песните коишто изобилуваат со лирски акценти и патриотски пориви, имаат своја оригиналност на изразот, рефлексивност и продирање до најдлабоката внатрешност на своето Јас. Но, исто така да укажеме и на зборовното наследство коешто не импресионира, значи „оживувањето“ на нашите древни зборови. Сето тоа ќе го најде читателот и во сонетните форми на песните и во слободните форми на певот.
Да потсетиме дека најзначајното што денес е остварено во современите текови на поезијата е остварено на помалите јазици. Затоа, негувањето на македонскиот јазик меѓу нашите иселеници-е централна, носечка задача на секој творец којшто создава во областа на литературата.
Марк Шоболев, со својот поетски ракопис низ изминатите седум децении ја изразува својата поетска идеја, преку лирски исповед укажува на македонската судбина и својот лелек, и тоа преку книжевна постапка; неговата голема дарба сотвори поетска книга, којашто преку естетските надградби на авторот се вообличи во: Значаен книжевен настан!
Матица
на иселениците од Македонија
Иселеничка Грамота за 2008. година
Едноставно но длабоко поетско кажување
Образложение на жири – комисијата за доделувањето на „Иселеничка грамота” за 2008-ма
Од пристигнатите книжевни дела на Конкурсот на Матицата на иселениците од Македонија, за доделување на наградата „Иселеничка грамота”, во најтесен избор влегоа –Рада Видиновска со„Харфа”, во издание на Медитеранска академија „Браќа Миладиновци„, „ИРИС-Р” од Струга, „Слики од ретровизорот” од Драгица Шредер во издание на Библиотека Јаблан – Белград и „Отмени празнини” од Виктор Б. Шеќеровски, издание на „Феникс” од Скопје. Жири комисијата во состав: Светлана Христова Јоциќ (претседател), Раде Силјан, Веле Смилевски Елена Оровчанец Спировска и Наќе Туфекчиев (членови) на својата седница одржана на 1 јули 2008 година по разгледувањето на пристигнатите ракописи донесе едногласна одлука - наградата „Иселеничка грамота” за 2008 година да му се додели на поетот Виктор Б. Шеќеровски за неговата поетска книга „Отмени празнини”.
Во образложението на жирито се вели:
Поетско остварување на Виктор Б. Шеќеровски носи естетски вредности кои го заслужуваат вниманието на читателите и критиката. Станува збор за сериозен поетски проект кој се темели на егзистенцијални преокупации кои колку што се иманентни на внатрешните расположби на поетскиот субјект, толку добиваат и пошироко, универзално значење. Поетското кажување на Шеќеровски е едноставно но длабоко: тоа понира во исконските човечки состојби кои постојано се во процес на преиспитување и како такви се во фокусот на творечките трагања. Ваквата поетика е комуникативна и предизвикувачка за реципиентот кој во стиховите на овој авторт секогаш ќе најде дел од животната вистина како сопствено сознание пред прашањата и дилемите својствени за нашето време.
Претседателот на Матицата на Иселениците Иван Џо Петрески свечено му ја врачува наградата “ Иселеничка Грамота “ на Виктор Б. Шеќеровски за делото – „Отмени празнини”(во издание на „Феникс”, Скопје, 2007), на годинашните Струшки вечери на поезијата кои се одржаа во Август 2008 година
Матица
на иселениците од Македонија
Конкурс за „Иселеничка
грамота“ - 2008
Наградениот поет ќе настапи на СВП
Матицата на иселениците
од Македонија распишува КОНКУРС за доделување
на традиционалната „Иселеничка грамота“ за најдобар поетски
опус објавен меѓу македонските иселеници за 2007 / 2008 година. Наградата
ќе биде врачена во рамките на „Струшките вечери на поезијата 2008“ во
Струга, а наградениот поет од Дијаспората, ќе настапи со свои творби на
завршната вечер „Мостови“.
Ги молиме авторите да ги достават своите творби до Матицата на иселениците
од Македонија - во четири примероци на своите објавени дела на адреса: Матица на иселениците од Македонија, ул. 27 Март бр. 5 П.Фах бр.
7, 1000 Скопје, Република Македонија.
Конкурсот завршува на петнаесетти (15) Мај 2008 година.
Жири комисијата добитникот на „Иселеничката грамота“ ќе го соопшти до
пети (5) Јуни, 2008 година на интернет страницата на Матицата на иселениците
(www.maticanaiselenici.com) и во jунскиот број на страниците
во илустрираното списание за иселениците од Македонија – „Македонија“
.
|
|
„Иселеничка
грамота“ за 2007
Образложение на жири – комисијата
за доделувањето на „Иселеничка грамота“ за 2007-ма
Интензивна поетска визија!
Од пристигнатите книжевни дела на Конкурсот
на Матицата на иселениците од Македонија, за доделување на наградата „Иселеничка
грамота“, во најтесен избор влегоа - Перо Дамчевски – Коцин со „Македонија
олтар“ (издание на Македонско литературно друштво „Глигор Прличев“, Сиднеј,
2007), Елизабета Петровска – „Солзи полни насмевки“ (издание на Заедницата
на Македонците во Хрватска, Загреб, 2006) и Ивица Челиковиќ – „Возови
во пајакова мрежа“ (во издание на „Македонска реч“, Скопје, 2006). Жири
комисијата во состав: Светлана Христова Јоциќ (претседател), Веле Смилевски,
Раде Силјан, Разме Кумбаровски и Бранка Доневска Најдовска (членови),
по разгледувањето на пристигнатите ракописи донесе едногласна одлука -
наградата „Иселеничка грамота“ за 2007 година да му се додели на писателот
Ивица Челиковиќ , за неговата поетска книга „ Возови во пајакова мрежа“.
Во образложението на жирито се вели:
Поезијата на Ивица Челиковиќ го одразува изреченото дека: „главен и најдобар
закон на поезијата е: нема никакви законитости!“ Токму тоа начело е содржано
и во најновото поетско издание, кое творечки е вкомпонирано во циклусите:
Траги, Сенки – Град, Минливост, Патување во триаголник и Допири. Покрај
„призвукот на една резигнантна филозофија на безизлезот, на трауматичните
состојби на современиот подвоен човек“, во книгата со необична синтагма
„Возови во пајакова мрежа“ се среќаваме со посложени симболи, со тродимензионалноста
на зборот, со интензитетот на поетската визија, но исто така и со поетовата
апстрактна филозофска мисла која е изразена во самиот поетски чин. И да
заклучиме:
Ивица Челиковиќ со силен поетски потег од себе си го одбра и ни го покажа
она што заслужува да биде извлечено и на естетски план сотворено.
Матица
на иселениците од Македонија
Извештај од Комисијата за доделување на наградата „Иселеничка грамота“
На 9 мај 2007 година се состана Комисијата за доделување на наградата „Иселеничка грамота“, што традиционално ја доделува Матицата на иселениците од Македонија, од 1992 година, за најдобра објавена поетска книга од македонски иселеници. После седум години застој, Матицата на иселениците од оваа година ја возобновува наградата „Иселеничка грамота“.
Од пристигнатите книги Перо Дамчевски – Коцин – „Македонија олтар“ (издание на Македонско литературно друштво „Глигор Прличев“, Сиднеј, 2007), Елизабета Петровска – „Солзи полни насмевки“ (издание на Заедницата на Македонците во Хрватска, Загреб, 2006) и Ивица Челиковиќ – „Возови во пајакова мрежа“ (во издание на „македонска реч“, Скопје, 2006), жири комисијата во состав: Светлана Христова Јоциќ (претседател), Веле Смилевски, Раде Силјан, Разме Кумбаровски (членови) и Бранка Доневска Најдовска (како претставник од Матицата), по разгледувањето на пристигнатите ракописи ја донесе следната одлука:
 
Наградата „Иселеничка грамота“ за 2007 година да му се додели на писателот Ивица Челиковиќ од Шведска, за неговата поетска книга „ Возови во пајакова мрежа“.
Наградениот поет ќе настапи на програмска точка за време на одржувањето на „Струшките вечери на поезијата 2007“, кога и свечено ќе му биде врачено признанието.
ДОДЕЛУВАЊЕ НА НАГРАДАТА "ИСЕЛЕНИЛКА ГРАМОТА "
Претседателот Иван Џо Петрески свечено му ја врачува наградата “ Иселеничка Грамота “ на Ивица Челиковиќ за делото – „Возови во пајакова мрежа”(во издание на „македонска реч”, Скопје, 2006), на годинашните Струшки вечери на поезијата кои се одржаа во Август 2007 година
|
|
|
|
